احنا اللى غربتنا فشنك للشاعر ايمن درويش

الشاعر ايمن درويش يكتب : إحنا اللي غربتنا فشنك واحنا اليتامي في دي البلاد واحنا اللي بيسمونا بنك واحنا اللي مرمطنا البعاد واحنا اللي شاحتين ...

الشاعر ايمن درويش يكتب :


إحنا اللي غربتنا فشنك
واحنا اليتامي في دي البلاد
واحنا اللي بيسمونا بنك
واحنا اللي مرمطنا البعاد
واحنا اللي شاحتين حبهم
واحنا اللي شايلين همهم
واحنا اللي سالفين ضحكهم
واحنا اللي بالنسبه لهم دفترشيكات
احنا اللي عايشين في الفشنك
واحنا اللي ضاحكين في الفشنك
واحنا اللي واكلين في الفشنك
ولما نزعل منهم نزعل فشنك
علاقتنا بيهم كرت شحن
وحبة صور متحمله علي اي لينك
الغربه تربه متزوقه بحبة ورود
احساس غبي انك تحس بعزله
عن كل الوجود
انك تلاقي العيد بيجي وتتحرم من حضن ابوك
انك بتقرا الفاتحه ع الصحبه القديمه
انك تحوش اللقمه وتبعتها لاخوك
ويوم ماتتعب حبه تاخد بالقديمه
وتلاقي كل اللي انت عشتلهم باعوك
ويدوب تفكر يومين في نفسك تلقي مرض ثم مرض ثم التابوت
كل شئ في الغربه قسط
العزال جيبينه قسط
والعيال فرحتها قسط
والايجار دفعينه قسط
حتي لما نحب نضحك
تترسم ضحكتنا قسط
احنا اللي بلونه وفاضيه
بتتنفخ بدين وقسط
احنا اللي غربتنا خدتنا
وخدرت احلامنا بنج
والمحصله توب قماش
وطرحه شاش
وكام ترنك
احنا اللي مغتربين اونطا
واحنا اللي غربتنا فشنك




[caption id="attachment_1266" align="aligncenter" width="300"]الشاعر ايمن درويش الشاعر ايمن درويش[/caption]

مواضيع ذات صلة

مقالات 6041516008322522839

المشاركات الشائعة

item